წმ. გიორგის სახელობის საერთაშორისო სკოლამ წარმატებით გაიარა ამერიკული სადიპლომო პროგრამის - COGNIA აკრედიტაცია. COGNIA გახლავთ გლობალური, მააკრედიტებელი ორგანიზაცია, რომელიც დაფუძნდა ამერიკის შეერთებულ შტატებში და აქტიურად მოქმედებს მსოფლიოს 90-მდე ქვეყანაში. დღეისათვის მისი აკრედიტაციითა და სერტიფიცირებით 40 000 საჯარო და კერძო დაწესებულება სარგებლობს, რომელთა რიგებშიც უკვე ჩვენი სკოლაც შედის.

ამერიკული სადიპლომო პროგრამით დაინტერესებული მშობლებისთვის 22 მარტს, 12 საათზე ჩატარდება ღია კარის დღე, სადაც გაეცნობით ინფორმაციას სწავლების მეთოდოლოგიის და კურიკულუმის, სერტიფიცირებული ამერიკული დიპლომის უპირატესობების, AP საგნების შესახებ დეტალურ ინფორმაციას.

ღონისძიებაზე დასასწრებად, გთხოვთ, დარეგისტრირდეთ ბმულზე:

https://forms.gle/7AYk3eRhRAQMETpn6

წმ.გიორგის სახელობის საერთაშორისო სკოლაში 23 თებერვალს, 13 საათზე ჩატარდება ღია კარის დღე, სადაც გექნებათ შესაძლებლობა, შეხვდეთ სკოლის ადმინისტრაციას, გაიცნოთ პედაგოგები, დაათვალიეროთ საკლასო ოთახები და სკოლის ინფრასტრუქტურა, გაიგოთ მეტი სასწავლო პროგრამის შესახებ და აღმოაჩინოთ მრავალფეროვანი ექსტრაკურიკულური აქტივობები.

 

„წმიდა გიორგის სახელობის საერთაშორისო სკოლამ“ 2024 წლის 18 დეკემბერს საერთაშორისო ორგანიზაცია COGNIA-ს ამერიკული აკრედიტაცია მოიპოვა.

ეს არის უმნიშვნელოვანესი ნაბიჯი სკოლის განვითარების გზაზე და კიდევ ერთი დადასტურება იმისა, რომ ჩვენი სკოლა უზრუნველყოფს განათლების პროცესის საერთაშორისო სტანდარტებთან შესაბამისობას.

განსაკუთრებით აღსანიშნავია, რომ განათლების ხარისხის განვითარების ეროვნულ ცენტრსა და ამერიკის შეერთებული შტატების საერთაშორისო ორგანიზაცია COGNIA-ს შორის გაფორმდა ურთიერთთანამშრომლობის ხელშეკრულება, რომელიც ითვალისწინებს საქართველოს ტერიტორიაზე განხორციელებული ზოგადსაგანმანათლებლო პროგრამების American International Accreditation Protocol-ის აღიარებას.

ეს მიღწევა განსაკუთრებული სტიმულია ჩვენი სკოლის გუნდისთვის, რათა კიდევ უფრო განვვითარდეთ და ჩვენს მოსწავლეებს შევთავაზოთ განათლების უმაღლესი საერთაშორისო სტანდარტი.

წმიდა გიორგის სახელობის საერთაშორისო სკოლა კვლავ ერთგული რჩება მაღალი ხარისხის განათლების ხელშეწყობის პრინციპების და მადლობას უხდის საზოგადოებას ნდობისთვის!

წმ. გიორგის სახელობის საერთაშორისო სკოლამ კომუნიკაციების კომისიის მიერ მასწავლებლებისა და მოსწავლეებისთვის გამართული მედიაწიგნიერების ოლიმპიადის დაწყებითი საფეხურის კატეგორიაში პირველი ადგილი დაიკავა.

აღსანიშნავია, რომ ოლიმპიადაში საქართველოს მასშტაბით უპრეცედენტოდ ბევრი, 500-ზე მეტი სკოლა მონაწილეობდა.

ჩვენი სკოლის მეოთხე კლასელების მიერ შექმნილმა სახალისო ვიდეომ, რომელიც კრეატიული და ინოვაციური მიდგომით ასახავს დეზინფორმაციასთან ბრძოლის გზებს, ჟიურის განსაკუთრებული მოწონება დაიმსახურა.

კომუნიკაციების კომისიამ ჩვენი სკოლა თანამედროვე მედიალაბორატორიისთვის საჭირო ტექნიკით დააჯილდოვა, რაც მოიცავს:

• ინტერაქციულ დაფას
• ლეპტოპს
• მობილურის შტატივს
• მიკროფონს
• ლედ განათებას

ამასთან ერთად, სკოლაში მოეწყო სპეციალური მედიაკუთხე, რომელიც ჩვენი მოსწავლეებისთვის საშუალებას შექმნის, დამოუკიდებლად იმუშაონ მაღალხარისხიანი მედიაპროდუქტების შექმნაზე.

სკოლამ, თავის მხრივ, გამარჯვებულ მოსწავლეებს საკითხავი კუთხე მოუწყო საკლასო ოთახში და ახლა უფრო კომფორტულ გარემოში გააგრძელებენ კითხვას და სწავლას.

მადლობას ვუხდით ყველა მოსწავლეს და მასწავლებელს, ვინც ამ წარმატებაში თავისი წვლილი შეიტანა!

ამერიკული პროგრამის აკრედიტაციის მიზნით, წმ.გიორგის სახელობის საერთაშორისო სკოლაში გასულ კვირას სამუშაო ვიზიტით იმყოფებოდა COGNIA-ს აკრედიტაციის ექსპერტთა ჯგუფი.

ვიზიტის მიზანი იყო ამერიკული სადიპლომო პროგრამის დანერგვის გზაზე სკოლისა და სასწავლო გარემოს შეფასება, საერთაშორისო სტანდარტებთან სასკოლო პრაქტიკის შესაბამისობის ანალიზი.

COGNIA-ს წარმომადგენელთა სამუშაო შეხვედრები გაიმართა სხვადასხვა სამიზნე ჯგუფთან:სკოლის ადმინისტრაციასთან, პედაგოგებსა და კათედრის ხელმძღვანელებთან, მშობლებსა და მოსწავლეებთან.

შეხვედრებისას დელეგაცია დეტალურ ინფორმაციას გაეცნო სკოლის ფილოსოფიის, მიზნების, სწავლა-სწავლების საკითხების, მოსწავლეთა და მშობელთა ჩართულობის, პედაგოგთა პროფესიული გამოცდილებისა და მიდგომების შესახებ.

ვიზიტის დასასრულს,COGNIA-ს წარმომადგენლებმა სკოლის ადმინისტრაციას გააცნეს დასკვნები და რეკომენდაციები. ჩვენდა საამაყოდ შეიძლება ითქვას, რომ ვიზიტმა წარმატებით ჩაიარა.

მადლობას ვუხდით ჩვენს სასკოლო საზოგადოებას მხარდაჭერისა და ჩართულობისათვის, COGNIA-ს ავტორიზაციის კომისის თითოეულ წევრს კეთილგანწყობილი, ობიექტური დამოკიდებულებისთვის.

აღნიშნული პროცესი სკოლის ცხოვრებაში მნიშვნელოვანი ისტორიის დასაწყისია.

27 ოქტომბერს საქართველოში მასწავლებლის ეროვნული დღე აღინიშნება. ამ მნიშვნელოვანი თარიღის აღსანიშნავად, ჩვენს სკოლაში გაიმართა მასწავლებლის კვირეული, რომლის ფარგლებშიც ჩატარდა მრავალი საინტერესო და სახალისო აქტივობა.

მასწავლებლის კვირეულმა კიდევ ერთხელ გამოკვეთა მასწავლებლების უდიდესი როლი და წვლილი ახალგაზრდების განათლებისა და აღზრდის პროცესში.

წმ. გიორგის სახელობის საერთაშორისო სკოლა ყველა პედაგოგს ულოცავს პროფესიულ დღეს!

წმ. გიორგის სახელობის საერთაშორისო სკოლაში პირველმა დღემ განსაკუთრებულად მხიარულად და საზეიმოდ ჩაიარა.

დავიწყეთ ახალი სასწავლო წელი და ამ დაუვიწყარ თავგადასავალში ჩვენი პირველკლასელებიც შემოგვიერთდნენ.

ვულოცავთ ჩვენს მოსწავლეებს, მასწავლებლებს და მშობლებს ახალი სასწავლო წლის დაწყებას!

2024 წლის სექტემბრიდან წმ. გიორგის სახელობის საერთაშორისო სკოლა გთავაზობთ ამერიკულ პროგრამას.

რატომ ამერიკული პროგრამა?

ამერიკული აკრედიტაცია COGNIA-ს მიერ ემსახურება 40,000 საჯარო და კერძო დაწესებულებას დაწყებითი საფეხურიდან საშუალო სკოლის ჩათვლით ამერიკის შეერთებულ შტატებსა და კიდევ 90 ქვეყანაში.

American High School Diploma: მიიღებთ საერთაშორისო აღიარების მქონე დიპლომს, რომელიც გაგიხსნით გზას მსოფლიოს წამყვანი და საუკეთესო უნივერსიტეტებისკენ.

ამერიკული პროგრამა VIII-XIl კლასის ქართველ და უცხოელ მოსწავლეებს სთავაზობს მრავალფეროვან ამერიკულ კურიკულუმს და უზრუნველყოფს მოსწავლეთა ჩართულობას საერთაშორისო საგანმანათლებლო და შემეცნებით ღონისძიებებში.

AP - საუნივერსიტეტო საგნები: შეთავაზებული Advanced Placement (AP) კურსების მრავალფეროვანი არჩევანი მოსწავლეებს მისცემს საერთაშორისო უნივერსიტეტებში პრიორიტეტული (Early Admission) ჩარიცხვისა და გრანტის მიღების უპირატესობას.

აშშ-სა და ევროპის წამყვან უნივერსიტეტში ჩარიცხვები: სტენფორდის უნივერსიტეტი, ჰარვარდის უნივერსიტეტი, ჩიკაგოს უნივერსიტეტი, კალიფორნიის ტექნოლოგიების უნივერსიტეტი, მასაჩუსეტსის უნივერსიტეტი (MIT), პრინსტონის უნივერსიტეტი, იელის უნივერსიტეტი, ედინბურგის უნივერსიტეტი და ა.შ.

ეს არის უნიკალური შანსი უმაღლესი ხარისხის ამერიკული განათლებისა და დიპლომის მისაღებად.

მოემზადეთ მომავლისთვის დღესვე!

ჩვენი მოსწავლეები ზაფხულის ცხელ დღეებს ახალდაბაში, ეკოლოგიურად სუფთა და ჯანსაღ გარემოში ატარებენ. ბანაკში ვერცერთ წამს მოიწყენ, აქ თითოეული დღე განსაკუთრებულია და დაუვიწყარი.ჩვენი ყოჩაღები სალაშქროდაც დადიან, სტუმრობენ მუზეუმებს, არც ფიზიკური ვარჯიში ეზარებათ და არც კითხვის საათი ავიწყდებათ, განსაკუთრებულად კი საქართველოს ეროვნული ნაკრების თამაშებს ელოდებიან და დიდი ჟრიამულით გულშემატკივრობენ ჩვენს ფეხბურთელებს.

26 მაისს ჩვენს სკოლაში ტრადიციული საქველმოქმედო გამოფენა-გაყიდვა გაიმართა.

"ერთად ერთმანეთისთვის" - ამ სლოგანის ქვეშ გაერთიანდა სასკოლო საზოგადოება ჩვენი მოსწავლის მამის და ჩვენი საყვარელი პედაგოგის მეუღლის, ლევან ზუროშვილის დასახმარებლად.

ხელოვნებისა და სპორტის კათედრამ შეაჯამა მთელი წლის საქმიანობა.ღონისძიების მონაწილეებს შესაძლებლობა ჰქონდათ, სხვადასხვა თემატური ზონაში შეეძინათ მოსწავლეთა ხელნაკეთი ნივთები, ნახატები, მათ მიერვე შექმნილი კულინარიული ნამუშევრები.

ასევე, გამოვლინდნენ სკოლის ჩემპიონები ჭადრაკში, მხიარულ სტარტებში, რაგბსა და ფეხბურთში.

#ერთადერთმანეთისვის სოლიდური თანხის შეგროვება შევძელით, რომელიც ჩვენი ბენეფიციარის ოჯახს გადაეცა.

მადლობას ვუხდით თითოეულ მოსწავლეს, მათ მშობლებს, მასწავლებლებს, რომელთაც მართლაც განსაკუთრებული სიყვარულით, მონდომებით, ერთობით ჩვენთან ერთად შექმნეს ეს დღე.

აქვე, გიზიარებთ ანგარიშის ნომრებს:

#GE27TB7329445063600010

#GE31BG0000000580869038

მიმღები მაკა ხელაძე.

დამამთავრებელი კლასის მოსწავლეებისთვის პროფესიის არჩევა განსაკუთრებით საპასუხისმგებლო გადაწყვეტილებაა

მნიშვნელოვანია მოსწავლეებისთვის პროფესიების მრავალფეროვნებისა და საგანმანათლებლო რესურსების შესახებ ინფორმაციის მიწოდება

ამ მიზნით  ჩვენი სკოლის მე-11 და მე-12 კლასის მოსწავლეებთან Alterbridge University • უნივერსიტეტი ალტერბრიჯი-ის, კავკასიის უნივერსიტეტი - Caucasus University-ის, ISET - International School of Economics - ისა და თავისუფალი უნივერსიტეტი - Free University-ის  წარმომადგენლების შეხვედრა გაიმართა

პრეზენტაციაზე მოსწავლეებს მიაწოდეს ინფორმაცია  საბაკალავრო პროგრამების, სწავლის უპირატესობებისა და  დასაქმების პერსპექტივების შესახებ.

 

ავტორის სტუმრობა ჩვენი წიგნიერი მოსწავლეებისთვის დიდი და მნიშვნელოვანი ამბავია.

ამჯერად მეხუთეკლასელ წიგნის კლუბელებს მწერალი კატო ჯავახიშვილი ესტუმრა, რომლის "სიყვარულით ელლი" სულ ახლახანს წაიკითხეს ჩვენმა ჭკვიანებმა.

შეხვედრაზე სტუმარმა და პატარა მასპინძლებმა სიამოვნებით უპასუხეს ერთმანეთის კითხვებს და გააზიარეს კითხვით მიღებული შთაბეჭდილებები.

ჩვენი სტუმრისთვის კი განსაკუთრებით საინტერესო ბავშვების მიერ შექმნილი და წაკითხული "წიგნიდან გაპარული ამბები" აღმოჩნდა.

მადლობას ვუხდით ჩვენი მკითხველების საყვარელ ავტორს სკოლაში სტუმრობისა და საინტერესო შეხვედრისთვის.

Book club "Giorgelebi"•წიგნის კლუბი "გიორგელები"

23 მარტს წმ.გიორგის სახელობის საერთაშორისო სკოლაში ღია კარის დღე გაიმართა.

შეხვედრაზე დაინტერესებულ მშობლებს სკოლის აკადემიურმა ნაწილმა გააცნო ინფორმაცია სასწავლო პროგრამის, სწავლის უპირატესობების, ექსტრაკურიკულური აქტივობებისა და სკოლის სამომავლო გეგმების შესახებ.

პრეზენტაციის დასრულების შემდეგ მოეწყო სკოლის ტური ჩვენი მასწავლებლების ხელმძღვანელობით, რომლებმაც სტუმრებს დაათვალიერებინეს სკოლის სივრცე, საკლასო ოთახები და ინფრასტუქტურა.

მადლობას ვუხდით თითოეულ მშობელს, ვინც ჩვენს სკოლას ირჩევს.

 

მე-8 კლასის მოსწავლეები საგანმანათლებლო ვიზიტით საქართველოს პირველ არხს ეწვივნენ. ვიზიტის წინაპირობას კი მათ მიერ ქართული ენისა და ლიტერატურის პედაგოგებთან ერთად შექმნილი პროექტი „თანამედროვე მოზარდი და ტელესივრცე“ წარმოადგენდა.

მოსწავლეებმა დაათვალიერეს პავილიონები, საეთერო, ესტუმრნენ საქართველოს რადიოს და გაეცნენ სატელევიზიო გადაცემის შექმნის სპეციფიკას.

ვიზიტის ფარგლებში მერვეკლასელები შეხვდნენ გადაცემა „წიგნების თაროს“ წამყვანს, ალექსანდრე ლორთქიფანიძეს, რომელთანაც საინტერესო დისკუსია გაიმართა წიგნიერებასთან და განათლების გამოწვევებთან დაკავშირებულ საკითხებზე.

მადლობას ვუხდით პირველი არხი-ს მასპინძ₾ობისთვის!

BTU • ბიზნესისა და ტექნოლოგიების უნივერსიტეტი-ს მხარდაჭერით ჩვენი მე-6 კლასის მოსწავლეებისთვის კიბერუსაფრთხოების ტრენინგი ჩატარდა, რომელსაც პროფესორი და კიბერ-სტრატეგიის მკვლევარი ანდრო გოცირიძე უძღვებოდა.

 შეხვედრის მიზანს მოზარდებში უსაფრთხო ინტერნეტის, კიბერჰიგიენისა და კიბერეთიკის შესახებ ცნობადობის ამაღლება წარმოადგენდა.

სკოლის ცხოვრებისთვის მნიშვნელოვანია ბავშვების დამეგობრება და ერთ გუნდად შეკვრა. ამისთვის კი ერთ-ერთი ყველაზე ეფექტური გზა საბანაკო შეკრებაა, სადაც მოსწავლეები არაფორმალურ გარემოში აგრძელებენ საგაკვეთილო პროცესს.

წელს ჩვენმა მოსწავლეებმა საინტერესო და სახალისო 8 დღე გაატარეს ბაკურიანში, რომელიც მათი ინტერესების გათვალისწინებით მრავალფეროვანი სახელოვნებო და შემეცნებითი აქტივობებით იყო დატვირთული.

ინსტრუქტორების დახმარებით, „გიორგელებმა“ მარტივად აითვისეს თხილამურებით სრიალი და ნამდვილ პროფესიონალებად ჩამოყალიბდნენ.

თანამედროვე ეპოქაში ადამიანის ცხოვრება კომპიუტერული ტექნოლოგიისა და ინტერნეტის გარეშე წამოუდგენელია. უამრავ შესაძლებლობასთან ერთად ინტერნეტს ინფორმაციის სწრაფად მიღებისა და გადაცემის ფუნქცია აქვს. ამიტომაც დროის უდიდეს ნაწილს ადამიანები ელექტრონულ მოწყობილობებთან ატარებენ. ბოლო პერიოდში  განსაკუთრებულ ინტერესს ადამიანები სერიალების მიმართ იჩენენ, რომლებიც ინტერნეტსივრცეში სწრაფად ვრცელდება. ასევე იქმნება ახალი თამაშები და ვიდეოები, რომლებიც განსაკუთრებულ ინტერესს იწვევენ მოზარდებში.

ინტერნეტში ნავიგაციას  ბავშვები/მოზარდები მარტივად ახერხებენ. მიუხედავად ასაკობრივი შეზღუდვებისა, მოზარდებისთვის ნებისმიერი მასალა მაინც ხელმისაწვდომია. მნიშვნელოვანია მაქსიმალურად გაკონტროლდეს ბავშვებისა და მოზარდების ონლაინსივრცეში მუშაობა.

ბოლო პერიოდში მსოფლიო მოიცვა სამხრეთ კორეულმა მინისერიალმა „კალმარის თამაშები“ (Squid game), სადაც ერთი შეხედვით ბავშვური, უწყინარი თამაშები, რეალურად  სისხლიან შეჯიბრებადაა ქცეული. განსაკუთრებული სისატიკითაა შედგენილი თითოეული თამაში. სულ რაღაც ერთი თვის გამოსულ სერიალს უამრავი მნახველი ჰყავს. სამწუხაროდ, აღნიშნული სერიალის შესახებ ინფორმაცია ჩვენს ბავშვებსა და მოზარდებს უკვე აქვთ. თავადაც თამაშობენ მიმსგავსებულ თამაშებს, ქმნიან პერსონაჟების ფანკლუბებს, დახურულ ჯგუფებს სოციალურ ქსელებში, სადაც განიხილავენ სერიალის გმირებს. მსგავს აქტივობებში ჩართულნი არიან ის მოსწავლეებიც, რომელთაც ჯერ კიდევ არ უნახავთ აღნიშნული სერიალი. მკვლევარებს უჭირთ ზუსტად იმის თქმა, თუ რამ გამოიწვია ასეთ მცირე დროში სერიალის პოპულარულობა, მაგრამ ფაქტი ერთია - დღითიდღე იზრდება ამ სერიალით დაინტერესებულთა რიცხვი. სასკოლო სივრცეში მოსწავლეები ხშირად დასვენებების დროს თამაშობენ/აცოცხლებენ  ფილმის სიუჟეტს მსგავსი წესებით. ამასთან დაკავშირებით ჩვენი სკოლის  პედაგოგებს შესაბამისი რეკომენდაცია გაეწიათ.

მნიშვნელოვანია მშობელთა ჩართულობა, რათა თამაშებმა ნეგატიური ზეგავლენა არ მოახდინოს ბავშვთა/მოზარდათა ფსიქო-ემოციურ და სოციალურ განვითარებაზე.  

• შეძლებისდაგვარად მეტი დრო გაატარეთ შვილებთან ერთად;
• ყურადღება მიაქციეთ, ბავშვი/მოზარდი დღის განმავლობაში რით არის დაკავეული და დაგეგმეთ მშობლებისა და შვილების ერთობლივი აქტივობები  (მაგალითად, გასეირნება პარკში, სამაგიდო და ლოგიკური თამაშები, ხელსაქმე, ფილმის ერთად ყურება და ა.შ.);
•  ყურადღება მიაქციეთ, რა თემაზე საუბრობენ. ავლენენ თუ არა უჩვეულო ქმედებებს, რაც აქამდე არ შეგიმჩნევიათ. ბავშვები ხშირად ბაძავენ ფილმის პერსონაჟებს.  იმეორებენ მათ ქცევას და იყენებენ იმავე ლექსიკას.  შესაბამისად, სიახლე ქცევასა თუ ლექსიკაში შესამჩნევი იქნება თქვენთვის;
• ყურადღება მიაქციეთ თამაშების შინაარსს. აუცილებლობის შემთხვევაში ჩაერიეთ. ეცადეთ ესაუბროთ და მათთვის გასაგებ ენაზე აუხსნათ, რა ნეგატიური გავლენა შეიძლება იქონიოს ამა თუ იმ ინფორმაციამ მათზე;
• გაეცით მათ კითხვებს პასუხები.  ეცადეთ, ინფორმაცია იყოს მოკლე და ლაკონური.  თავად დაუსვით კითხვები. ეცადეთ გაიგოთ, რა იციან ამ საკითხის გარშემო. იყავით ყურადღებით, არ მიაწოდოთ იმაზე მეტი ინფორმაცია, ვიდრე თავად ფლობენ ამა თუ იმ თემის გარშემო;
• დაგეგმეთ ერთად საინტერესო და შემეცნებითი ფილმის ნახვა.  აღფრთოვანება გამოავლინეთ დადებითი პერსონაჟების ქმედებების მიმართ;
• იყავით უფრო დირექტიულები. აუხსენით ბავშვებს, რომ არის რაღაცები, რისი ცოდნაც გარკვეულ ასაკს მოითხოვს. მათ უნდა იცოდნენ, რა არის დაშვებული და  მათი ასაკისთვის შესაფერისი;
• ბავშვებმა უნდა იცოდნენ, რას ემსახურება მსგავსი ტიპის ფილმების, სერიალების, თამაშების შექმნა და გავრცელება. მათ უნდა აუხსნათ, რომ ზოგიერთი ადამიანი ბოროტად სარგებლობს სხვების მორჩილი ბუნებით. მათ ადვილად შეუძლიათ ასეთ ადამიანებზე ზეგავლენა მოახდინონ, პირადი გამორჩენის მიზნით (შექმნან ბიზნესი, მიიღონ შემოსავალი და მისთ);
• ესაუბრეთ მეგობრულად და არა კრიტიკულები შემფასებლის პოზიციიდან. ბავშვებმა უნდა იცოდნენ, რომ შეცდომებს ყველა ადამიანი ვუშვებთ, მაგრამ გამოსწორება ყოველთვის არის შესაძლებელი;
• ბავშვებს/მოზარდებს აუხსენით, რა არის რაიმეზე მავნე დამოკიდებულება  და როგორ ადვილად შეიძლება ჩანაცვლდეს ერთი დამოკიდებულება - მეორით.  მოუყვანეთ მაგალითები ყოველდღიური ცხოვრებიდან, პირადი გამოცდილებიდან და ა.შ.;
• ეცადეთ დაანახვოთ ბავშვებს/მოზარდებს ინტერნეტსივრცის არარეალურობა, მისი დადებითი და უარყოფითი გავლენა ადამიანებზე. პირიქით, დაანახვეთ მათ რეალური სამყაროს დადებითი მხარეები;
• დაეხმარეთ, აღმოაჩინონ სამყარო დამოუკიდებლად, ისწავლონ საკუთარ შეცდომებზე და არ იხელმძღვანელონ სხვების მიერ მიწოდებული ინფორმაციით (იქნება ეს მულტფილმი თუ ფილმი, სადაც მეტისმეტად დეტალურადაა სიუჟეტი მოცემული ყოველდღიური ცხოვრებიდან); 
• ხშირი აქცენტირება/აკრძალვა აღნიშნული თამაშის/სერიალის მიმართ გაზრდის ინტერესს და გამოიწვევს ბავშვის გაღიზიანებას;
• შეარჩიეთ შესაბამისი დრო საუბრის დაწყებამდე;
• შეინარჩუნეთ სიმშვიდე;
• არ უსაყვედუროთ;
• არ შეიაშინოთ;
• არასდროს გააუფასუროთ ბავშვის/მოზარდის მონათხრობი. აგრძნობინეთ, რომ მისი აზრი და ნაამბობი მნიშნელოვანია;
• დააკვირდით, ხომ არ აქვს ბავშვს/მოზარდს ძილის პრობლემები;
• დააკვირდით გუნება-განწყობის ცვლილებას;
• პატივი ეცით ბავშვის/მოზარდის პირად სივრცეს, თუმცა გარკვეულ შემთხვევებში მნიშვნელოვანია გადამოწმება/გაკონტროლება. ყურადღების გაზრდა არ ნიშნავს გადამეტებულ კონტროლს, შეზღუდვასა და აკრძალვას;
• არ დაანახვოთ ბავშვებს თქვენი მღელვარება. შეეცადეთ, იყოთ ზომიერი, კარგი მსმენელი, თავდაჯერებული, ინფორმირებული, გულისხმიერი, რათა უფრო მეტი ნდობა მოიპოვოთ.
• გახსოვდეთ, რომ ახალი თამაშების შექმნა და მათი მრავალფეროვნება შეუქცევადი პროცესია. თქვენ ყოველთვის არ გექნებათ ინფორმაცია, თუ რა სახის აქტივობებში არიან ჩართულნი თქვენი შვილები. ამიტომ მნიშვნელოვანია, იყოთ მათთან ახლო ურთიერთობაში. თავად იყოთ გულწრფელნი და გაუზიაროთ მათთვის ასაკის შესაბამისი ინფორმაცია. განსაკუთრებით ეფექტურია, როცა თავად უყვებით პირად განცდებსა თუ გამოცდილებაზე. ასეთ დროს მათი მხრიდანაც ნდობა იზრდება და მეტი ინფორმაციას გასცემენ.
• გახსოვდეთ, მსგავსი ტექნოლოგიური თამაშები/ვიდეოები კარგავს ელფერს, როცა ადამიანი დაკავებულია საინტერესო აქტივობებით. ბავშვებზე შთაბეჭდილების მოხდენა საკმაოდ მარტივია. ეცადეთ, დაიცვათ ზომიერება. ერთდროულად ბევრი აქტივობა არ შესთავაზოთ. გაითვალისწინეთ, ძლიერი შთაბეჭდილებებისა თუ ემოციის მიღების შემდგომ რთულია რაიმე მცირედით დაინტერესება;
• გახსოვდეთ, ეს თქვენ ხართ უფროსი და თქვენ უკეთ იცით, რა არის ბავშვისთვის სასარგებლო თუ საზიანო. ამიტომ ნუ მოგერიდებათ, ბავშვს აუხსნათ თქვენი ამა თუ იმ ქცევის მოტივი. მან უნდა იცოდეს, რომ ზოგჯერ  მის თხოვნას ვერ გაითვალისწინებთ გარკვეული მიზეზების გამო. როცა კი მოგეცემათ საშუალება, რომ მისი აზრი გაითვალისწინოთ, აუცილებლად შეასრულეთ ეს. ასეთი მიდგომით ბავშვი გრძნობს, რომ ის და მისი შეხედულებები ოჯახის წევრებისთვის მნიშვნელოვანია და როგორც კი ამის შესაძლებლობა იქმნება, ითვალისწინებენ მას;
• თუ ბავშვის/მოზარდის ქცევაში შენიშნავთ რაიმე ტიპის უჩვეულო  ქცევას, მიმართეთ დამრიგებელს, რათა მეტი ყურადღება მიაქციოს მოსწავლეს თანატოლებთან ურთიერთობების დროს;
• თამაშებთან დაკავშირებული სოციალური  ჯგუფის არსებობის შემთხვევაში, გამოიკვლიეთ და დააზუსტეთ,   თუ რა მიზნებს ემსახურება აღნიშნული ჯგუფი. აუცილებლად, დაანახვეთ აღნიშნული ჯგუფების უარყოფითი მხარეები, ცოცხალი კომუნიკაციის მნიშვნელობა და ეფექტურობა.

 

 

 

 

 

 

 

 

 

 

2021-2022 სასწავლო წელი 

სკოლის მისიაა აღზარდოს სულიერად და ფიზიკურად ჯანსაღი, მართლმადიდებლური ღირებულებებისა და ეროვნული ტრადიციების მატარებელი წიგნიერი პიროვნება, რომელიც შეძლებს საკუთარი ცოდნისა და უნარების რეალიზებას როგორც ქვეყნის შეგნით, ისე მის ფარგლებს გარეთ, გარემოში წარმატებულ ორიენტირებასა და სახელმწიფოებრივ-საზოგადოებრივი ინტერესების დაცვას.

სკოლის დევიზია: “non scholae sed vitae discimus” – “ვსწავლობთ არა სკოლისთვის, არამედ ცხოვრებისთვის“.     

ბავშვს მათემატიკა არ უყვარს და მის მიმართ ინტერესი დაკარგული აქვს?

 ამ დროს შეგვიძლია რამდენიმე ნაბიჯი გადავდგათ, რომ პატარას საგნის სწავლის სურვილი გაუჩნდეს.

 თავდაპირველად ბავშვს მეცადინეობის ნაცვლად, საგნის თამაშით შესწავლა შევთავაზოთ, რადგან თამაშში იგი ბევრად თავისუფლად იგრძნობს თავს და მეტ ინტერესსაც გამოავლენს.

 მნიშვნელოვანია გვახსოვდეს, რომ ბავშვთან ერთად მათემატიკური ამოცანებისა და თავსატეხების ამოხსნის პროცესი უფროსებისგან დიდ მოთმინებას მოითხოვს. ამ დროს მეგობრულად ვითანამშრომლოთ მასთან, ყოველგვარი კრიტიკისა და შედარებებისგან თავი შევიკავოთ (ბავშვს შეცდომების დაშვების არ უნდა ეშინოდეს) და დავარწმუნოთ, რომ დაუძლეველი არაფერია.

 და ბოლოს, ჩვენც მივუდგეთ ამ საგანს როგორც შემოქმედებითს, საინტერესოსა და ძალიან სახალისოს - ეს ყველაფერი აუცილებლად აისახება ჩვენი პატარას ინტერესსა და სურვილზე მათემატიკის სწავლის მიმართ.